今天原本是細佬學校的世運會，怎知因天雨關係取消了，今天整天留在家裡，就分享家人趣事吧！
早上，一人一個菠蘿包
告訴大家一個秘密，媽媽雖然買很多衫給我和細佬，不同款色，扮鬼扮馬，不過在媽媽心目中，她最最最喜歡的，還是我們最down to earth的…底衫look，露少少點會更好！
細佬自己 “丘”的褲，勁求其！
細佬在反斗奇兵3裡學了勞穌的一招，收埋媽媽個咀！
媽媽買了新衫衫，特意用來襯細佬的長頸鹿，細佬很開心，細佬還驕傲地說：『我後面有，你後面無！』
幫細佬挖了一粒大耳屎，有8mm之大！
跟媽媽美甲，媽媽幫我美的甲，靚呢！媽媽說，這個設計是有意義的，是要教我『無論天氣是怎樣，我們都要用開心的心情去面對』
我的下午茶，很平宜，因為一杯少冰不少甜的，可以多沖一杯出來！
早前，爸爸高興地告訴媽媽他買了件衫衫給我，媽媽一看：『吓！』回到家讓我一看，我：『車~』唔…爸爸，買衫之事，你出錢好了，還是留待我們的stylist去搞吧！
晚上活動，玩泥膠
還打麻雀
爸爸煮宵夜，可惜全歸入我和細佬的肚子裡
爸爸忍不住，還是叮了一個糯米雞。
我們家，來了一班不速之客，一缸魚仔。
話說，上兩個星期，婆婆為逗我開心，用兩元買了一包魚仔給我，回到家裡，死一條又死一條，有人很傷心…爸爸為逗那人開心，就買了幾隻色彩鮮艷的魚仔！
唉…我媽媽，怎麼這麼看不透，爸爸給媽媽解釋了，其實早前買的應該是有病的魚，用來餵其他魚的，只是婆婆亂買一通，媽媽又何須傷心呢！雖然是明白，但是媽媽覺得，看在眼內，心裡還是慽慽然的，不要緊吧！有了這班不速之客，家裡也多了點生氣，假日又多了一個新活動…逛金魚店，我和細佬學會每天要餵魚魚，最緊要是，新買的魚，健康得多！
今天，我們為魚仔們添置一位新成員，原本四條，何以要加一條，媽媽說，好像我們的家一樣，一家四口要請一個工人來做淸潔，是啊，我們今天去請工人魚仔！
有一次，我不停要飲果汁，飲完橙汁飲提子汁，媽媽說：『你記唔記得愛牙果套dvd呀？楊日楊月(主角)去o左果汁瀑布，飲完d果汁之後蛀晒牙呀！』
我回答說：『係假架！』
媽媽無奈：『真難教…』
有一次，我問媽媽：『你點解買咁多鞋架？買一對返工著咪得囉』
媽媽說：『咁要唔多顏色黎襯衫架麻，好似如果返工衫係紅色，就著著紅色鞋咁囉！』
我說：『咁你買兩對咪得囉！』
有一次，我問媽媽：『你點解買咁多袋架？』
媽媽說：『女孩子之中，媽媽唔算多手袋架啦』
媽媽心想：『慘啦，以前買野老公都唔管，而家反而俾個女管！』
有一次，媽媽望著我，說：『你同我真係好似樣喎！』
我說：『但係你皮膚“鞋”過我喎！』
媽媽說：『咁媽媽老啦麻』
我說：『係咪你話廿五歲就會老架啦？』
媽媽心想：『呢d你又記得咁清楚！』
媽媽說：『係呀，你細個，皮膚就會更新得好快，所以成日都好滑，但係媽媽老o左，用好多護膚品都唔可以好似你咁，證明天父創造o既野係人點叻都做唔到』
我說：『咁天父點解唔做到我地可以成世都咁靚呀？』
媽媽說：『因為天父想我地唔好成日掛住要靚，大個咗，應該要追求第二樣野，好似做媽媽啦，要掛住照顧小朋友啦，唔好掛住扮靚架啦！』
媽媽心想：『呢個係我滲透咗好耐o既諗法，而家傳授俾你，你一世受用架！』
有一次，我想去游水，爸爸說落雨，去游水很危險，會被雷打的！
我問：『點解天父要整d咁危險o既野？』
媽媽說：『因為天父要彰顯佢偉大的一面…』
媽媽心想：『咦？好似深o左少少，下次都係話，用黎訓d曳人算啦！』
有一天，媽媽在電視上見到羅x林 (在女拳裡飾演莫師傅一角的演員)，
問我：『你記唔記得佢係女拳到叫咩名？』
我遲疑了一會
媽媽說：『係莫師傅呀！』
我說：『咁你你記唔記得d村民叫桂蘭 (莫師傅的姪女，也因為教功夫所以被叫為莫師傅做乜野？』
媽媽想了一想，說：『好似都係叫莫師傅喎』
我說：『咪係囉！』
牙尖嘴利的人~~~~~~~~~~~~~
天色很好，媽媽要出街，決定去行山頂的路！
媽媽以為山頂那條山路很易走，所以沒有穿波鞋，穿了平底鞋，我更甚，穿了涼鞋。
我們首先乘纜車上山吃午飯，媽媽說我是第一次坐纜，細佬是第二次，我糾正媽媽說，我以前都坐過一次架，嘩！真好記性！
原本想讓爸爸吃好一點，可惜這裡很多人，而且吃好一點的，真是很貴，所以最後去了吃日本拉麵加Pancake，務求可以滿足爸爸吃日本食物的要求之餘，又可以滿足我吃雪糕的要求！
感謝神，今天的天氣可以用完美來形容，藍天日雲，又有點風，沿途又有很多樹陰！不錯，只是原來路線不是想像中那麼短，媽媽的鞋穿到腳板起了水泡！
看看天色多好，連不懂用相機的媽媽在纜車內拍的天，都那麼漂亮！
太貴太多人了！
有一天，齊齊要求媽媽幫他挖耳屎，挖的時候，細佬咳了幾聲…
細佬對媽媽投訴說：『你"了"到我打乞嚏啦！』
媽媽被屈，仍然糾正細佬說：『你頭先咳之喎！』
細佬說：『你"了"到我咳啦！』
突然，細佬又咳兩聲，便跟媽媽說：『係咪呀！』媽媽十分無奈…
但是呢，不要誤會，媽媽挖耳仔的手勢十分不錯，過了一會，細佬說：『咁舒服架！』
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
有一次，天雨路滑，細佬差點跣倒，好在拖著媽媽！
媽媽問：『點解你會跣親架？』
細佬說：『因為好跣囉！』
媽媽問：『但係個個都無跣親呀，淨係得你之喎，係咪你特別論盡呀？』
細佬唯有承認：『係囉！』
媽媽乘勝追擊，說：『咁點解你咁論盡架？』
細佬說：『因為好跣囉！』
媽媽問：『但係個個都無跣親呀，淨係得你之喎，係咪你特別論盡呀？』…不停在重覆…
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
細佬說：『媽媽，$%^&*(&*(*&^ (聽不清楚)，好唔好呀？』
媽媽：『咩好唔好呀？』
細佬說：『好唔好呀？』
媽媽：『咩好唔好呀？』
細佬不奈煩了，說：『(大聲一點)好唔好呀？』
媽媽：『咩好唔好呀？』
細佬更不奈煩了，說：『(很大聲)好唔好呀？』…最終都是沒有結果的！
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
媽媽要細佬吃飯：『吃埋呢啖啦！』
齊齊說：『算啦！』
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
有一次，齊齊不小心踩到媽媽，媽媽叫痛，細佬還要大笑起來！
媽媽說：『你踩到我流血啦！』原來這位置是媽媽早前行山山弄到損的位置，媽媽向細佬展示傷口。
齊齊望著媽媽，流露不好意思的樣子，呆了好一會，然後說：『算啦！』
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
媽媽罵細佬說：『齊齊你好曳呀！』
齊齊更惡地說：『做咩話我曳架！』證明…有時，是要靠惡的！
~~~~~~~~~~~~~~~~~~~~~~~~~~~~~~~~~~
睇唔出你咁惡~~~~~~~~~~~~~~~~~
