一家團聚

爸爸媽媽回港第一天，坐的士回家，的士司機好好人，先去了芳姨家接我和細佬，再載著我們一家回家，因為的士錢是lump sum，所以司機叔叔是提供了額外服務的。

爸爸媽媽接我和細佬，我已經很興奮，坐在媽媽的大腿上，不停跟媽媽說：『我心裡面好掛住你啊！你咁耐都唔黎接我o既！』

除此之外，我還跟媽媽有很多很好笑的對話。

媽媽：『咦！細佬剪o左頭髮喎！』

我：『係呀！細佬剪o左東菇頭，可以煮黎食呀！』

 

我：『媽媽，芳姨話我頭髮長啦，你幫我剪頭髮啦！』

媽媽：『好呀！我星期六幫你剪呀！』

我：『唔好啦，今日剪啦！』

媽媽：『嘩！太陽伯伯都收o左工啦，媽媽都無得收工！』

我：『點解太陽伯伯收o左工o既？』

媽媽：『佢要返屋企陪下老婆架麻』

我：『我好耐無見佢老婆loo』

媽媽：『佢老婆係邊個？』

我：『月亮囉，我好耐無見過月亮啦』

連司機叔叔都笑了！

 

回到家裡，媽媽跟我換衣服，我不肯，怕被爸爸看到

媽媽說：『唔怕俾爸爸睇到啦』

我說：『因為我同爸爸好friend呀？』

媽媽說：『唔係friend呀，我地係親人呀，爸爸媽媽津津同細佬係親人呀』

我說：『咁我地邊個結o左婚呀？』

媽媽說：『爸爸同媽媽囉』

我說：『咁我同細佬結o左婚未呀？』

媽媽說：『未呀』

我說：『點解未架？』

媽媽說：『因為你地未搵到鍾意o既人囉』

我說：『我搵到呀，係媽媽！』

 

我見媽媽今天晚上對我特別好，醒目的我當然打蛇隨棍上

媽媽說：『媽媽都心裡面好掛住你架！』

我說：『咁你以後唔好打我啦！』

媽媽說：『唔打唔打』

我說：『曳都唔打，乖都唔打！』

媽媽說：『唔打唔打』

我說：『曳都要錫，乖都要錫！』

媽媽說：『得得得，以後都錫晒你！』

細佬，一回家便推他最喜愛的那張藍色椅子。