津津的話

津津又再次發放笑彈，大家小心！

有一天，我拿著一個兜兜，說要斟杯水水給媽媽，怎知媽媽在扮我：『我要用奶樽呀！』我說：『你大個架啦，無得用奶樽架啦！』媽媽仍在堅持：『我要用奶樽呀！』我說：『你用啦，你睇下有無人笑你！』

有一天，媽媽跟我睡覺，媽媽又扮我：『你要攬住我呀！』我說：『唔得呀！』媽媽問：『點解唔得呀？』我伸出雙手，說：『你睇下，我隻手咁短！』

又有一天，細佬坐著爸爸的大腿上，爸爸要我喝兩啖橙汁後便要將橙汁歸還給他，怎知我把拿著橙汁的手伸出，卻是在爸爸拿不到的距離前，爸爸說：『我攞唔到呀！』我說：『我隻手唔夠長呀！』激死爸爸了。

我會數出細佬在影樓拍照的造型，扮廚師啦、扮消防員啦、扮日本人啦、扮胡廸啦！我說：『媽媽，你果日唔俾我影相呀！』媽媽說：『唔係呀，你有同爸爸媽媽細佬一齊影架！』我說：『細佬影相果時，你唔俾我行埋去呀，你仲鬧得我好惡添呀！』(媽媽：嘩，津津你真記仇啊！)

有時候媽媽會數我曳的地方，媽媽說：『打細佬啦、又唔食飯啦…』很多次，我都會幫媽媽一起數：『又要飲奶奶水水啦、又鴨片啦…』。

以前，媽媽常常講出一些疑幻似真的個案來嚇我，當然有些是真有些是假，我現在都學會了，媽媽每給我講一個道理，我就作一個故事出來，例如，媽媽叫我不要打細佬，我說：『有個小朋友呀，佢打BB呀，俾警察拉O左呀！』爸爸說：『津津，你成日話果個小朋友，果個小朋友根本就係津津你自己！』聽了之後，我都忍不住笑起來！