買樓+揀老公+玩弄媽媽

我說：『媽媽，第時我買樓，你幫我揀呀？』

媽媽說：『我又無份住o既，我點解要揀呀？』

我說：『我會同你住架！』

媽媽說：『你第時嫁人，就會建立自己屋企，到時就唔會再同爸爸媽媽住架啦！』

我說：『咁住附近啦！』

媽媽說：『都好喎，到時媽媽退休，就學煮飯，咁你同你老公就返黎媽媽到食飯啦！』

此時，爸爸加插一句：『媽媽為o左你學煮飯，真係好偉大！你係咪得架？』

媽媽說：『estela都得啦，我諗都得卦！』

我說：『我都可以架喎！』

媽媽說：『嘩，你咁叻？』

我說：『係呀，好易之麻，加d鹽，再加粒濃湯寶咪得囉！』

 

話說媽媽看過女拳，十分喜歡正氣凜然的黃師傅，又感動桂蘭受盡苦頭都要嫁給黃師傅，媽媽說，其實黃師傅也是媽媽那杯茶，若果要嫁，也要像桂蘭一樣嫁一個頂天立地又正義的大丈夫！

媽媽問我：『津津，你第時要嫁個點樣o既老公，我俾你揀，(a)、要靚仔…』

我說：『要靚仔！』

媽媽說：『等我講埋先啦，(a)、要靚仔 (b)、要有錢 (c)、好錫你 (d)頂天立地的大丈夫，好似黃師傅咁』

我說：『樣樣都要！』

媽媽說：『唔得，只可以要一樣，即係如果要靚仔，就無錢又唔錫你又無正義感，有錢就好醜樣唔錫你又無正義感…』

我說：『咁我要靚仔…同埋有錢，兩樣啦…同埋錫我…三樣啦』

媽媽說：『都話唔得囉，是但啦，其實媽媽相反，頭三樣都唔重要，我淨係要嫁俾一個頂天立地的大丈夫，就算唔靚仔，對我唔夠細心或著要捱窮，我都甘心樂意架！』

 

還有一次，我整古媽媽！因為每次做資料搜集做得多了，有一次媽媽一知道要做資料搜集，便說：『唔係呀麻，又做！』

於是有一次，我說：『er…媽媽，要做資料搜集，資料物動呀』

媽媽因為擔心又要做而沒有說話好一會…

我扮媽媽說：『唔係呀麻，又做！』媽媽才明白我是作弄她呢！

 

有一天，媽媽聽電台說：要記住三個三的原則，第一個“三”，每天擁抱孩子三秒鐘，第二個“三”，每天跟孩子說話三十分鐘，第三個“三”，就是逢星期三都不可以加班工作，回家陪孩子！與煲劇師奶媽媽講無記電視劇，都算做到了！還要記住逢星期三不可以加班，打波也不可以！