津津的話

如果我百厭了，媽媽會厲著我說：『你唔好再曳了，媽媽好惡架！』於是有一次，媽媽抱我上洗手間，我說：『你扶住我呀，唔好跌我入厠所到呀，我好惡架！』。

有一次，我不停"嘭"廚房裡的門，媽媽叫我停下來我都不聽，媽媽生氣了，用力打了我手手幾下，我哭了，後來媽媽也心痛了，對我說：『媽媽係唔係打到你好痛，對唔住！』我於是跟媽媽說：『你下次慢慢打呀！』

媽媽說，我常常學了她說話的用詞和語氣，所以很多時我講話，都會提醒媽媽她有什麼口頭嬋。以前，我跟媽媽說：『呢個好搞笑 / 細佬好搞笑』，媽媽就知道，媽媽自己在不知不覺間說了很多『好搞笑』。

『好有心機』應該芳姨的口頭嬋，有時我會跟媽媽說：『細佬好有心機』，媽媽都覺得很好笑，媽媽覺得，等我長大後明白『有心機』的意思，也應該會覺得說八個月大的細佬很有心機是很好笑。

『好舒服架』是婆婆的心頭嬋，我常常要媽媽陪我玩夾手指，我會跟媽媽說：『媽媽，你放隻手指入去，好舒服架』，媽媽信我至奇。有一次，媽媽吃香口珠，我問媽媽：『香口膠係唔係食o左牙仔好舒服架？』，是不是很識o野呢？

最近，媽媽跟我講話，無論媽媽說的是什麼，我第一個都會是：『吓？』有一次，媽媽問我：『津津，食唔食糖糖呀？』我反應：『吓？』，媽媽再問：『食唔食糖呀』，我再反應：『吓？』，媽媽繼續問，我都是回應一個：『吓？』，於是媽媽說：『食就講"食"，再"吓"就即係唔食架啦』，我於是回應一個：『食！』，媽媽把這事告訴爸爸，爸爸說：『都係學你架囉』。

最近，我把『係邊到』變為『係邊鼠』，正當媽媽想找出我是學誰人講話，有一次，媽媽在找東西時不自覺地說『係邊鼠呀』，啊！原來又係學媽媽。

有一次，媽媽跟我在客廳玩，爸爸在廚房，媽媽突然問我：『津津，你去唔去游水呀？』我說：『好呀』，媽媽說：『咁你要問下爸爸喎』，我於是拎轉身問：『得得架 (得唔得架？)』試想，在廚房忙著的爸爸又怎可以聽到我的問題，所以爸爸沒有給我一點反應，我於是走到廚房，一邊走一邊自言自語說著：『成日都聽唔到我講o野o既』，走到廚房爸爸跟前，我問：『爸爸，得得架？』爸爸一片茫然，我再說『得得游水』，爸爸依然茫然：『德德郵水』，我再慢一點說：『得~得~游~水』，爸爸終於明白，答我：『唔得呀，你咳咳流鼻水呀』，於是我返到媽媽身邊，邊走邊說著：『爸爸話唔得架』，看在眼來的媽媽其實已經笑到差點斷氣。後來，媽媽告訴爸爸整件事，爸爸問媽媽：『你覺唔覺得津津真係好鬼似你呀？』

有一次，我跟媽媽說：『返學唔可以查油指甲架』，媽媽問：『邊個講架？』，我說：『歐陽老師囉』，媽媽問：『佢點講呀？』，我同一句說話，我改變語氣，大大聲慢慢說：『返~學~唔~可~以~查~油~指~甲~』，笑死。

上次跟姨婆舅婆吃團圓飯，媽媽湊著細佬等位時，隱約知道我把鼻屎放在別人處。有一次，媽媽跟我睡覺時問起這件事：『津津，你果日食飯係唔係hide鼻屎落姨婆到』，我答：『係舅婆』，媽媽問：『係點hide架？』，我繪聲繪影地答：『我咁樣…撩(高八度配合動作)，放(配合動作)…舅婆手手到』，媽媽問：『咁舅婆點講呀』，我答：『佢話話俾朱老師知囉！』。

有一次，媽媽想幫我帶上花女頭飾，看看是否好看，但當我正在拋波波時，不願被媽媽騷擾，我大叫：『陣間先結婚啦』。