試做facial+中秋晚會

收到美容院的promotion，可以免費做facial，包括由醫生做的皮膚分析，再加激光、彩光或換膚其中一種療程，身為師奶的我，怎可以錯過這樣的機會呢！仲要拿拿聲報名，慌死會fully booked。

嘩，大雨到呢…個天黑到呢…個地方又偏到呢…我都頂硬上。

到了，其實都一早講好會做兩個半小時 ，所以我都預俾d小姐(佢話佢係姑娘)不停咁同我講野，我一打開銀包，佢地見到齊齊幅相，大叫靚仔，不停咁問我問題：『個女幾大，個仔幾大，影相果時幾大…』，跟住姑娘又同我由皮膚結構開始講起…佢話佢大我兩年，都有個仔，所以keep住做激光同埋換膚，激光可以令collegan增生，換膚可以去死皮角質層喎(磿沙唔得咩？佢話無咁全面喎)，仲打埋botox令額頭唔會有皺紋喎。

見醫生啦，姑娘一早提示我，話醫生講野比較直，小心HURT親，但係醫生竟然話我：『OK，有八十分！』『不過…(重點黎啦)，你D皮膚有點老化，你可以使好多錢令佢去到九十分，或著甚至九十五分，不過更加緊要係你要KEEP住八十分，咁你就要做激光黎KEEP住佢八十分，激光可以令collegan增生，咁毛孔會自然收細，回復彈性，去暗啞…』所以醫生決定幫我做激光。

等做激光之際，又黎姑娘同我傾計，講解一次有咩要注意，跟住…因為要等機，所以傾o左好耐…姑娘連佢老公大佢幾多年，佢老公成日都怨懷才不遇，佢係拍o左拖兩年有o左bb先結婚，佢媽媽當年都勸佢唔好嫁，佢奶奶舊年過身的事都同我講埋…仲有，佢話好羡慕我，因為我可以咁後生結婚生兩件，老公咁好，老公仲要咁高大靚仔(無錯，呢個的確係我寫呢個blog的其中一個重點)，真係唔好睇少d美容師，你開一開個銀包，佢就會知你好多野…

換黎o既係彩光師，sean，男性，佢問下我有乜想重點做之後就開始，我實在忍不住，問o左佢一個問題，因為我很奇怪彩光師是什麼專業，於是我問佢：『你讀咩科會做彩光師架呢？』然後佢話：『講你都唔信，我係standford讀engineering的！』於是大家又打開話題，話題又包括：『我係讀civil engineering但係佢以為我已經無做野、我份工都幾游閒、佢係standford讀下d skin care同埋nutrition於是入行、佢同佢女朋友拍拖八年下年結婚、佢因為聽媽媽話先遲遲唔結婚，佢話媽媽話早結婚的婚姻不好、我話佢咁聽呀媽話佢話因為世上只有媽媽好、佢問我老公聽邊個話我話聽我話、佢話醫生下個月結婚 (我咁岩之前見到醫生個女朋友，真係好靚好有氣質，最緊要係好瘦同埋皮膚好靚)，我問佢咁孝順使唔使老婆都要好孝順，佢話要、我話我以前同奶奶相處唔好(佢竟然話睇得出)，奶奶病o左至黎後悔，佢話無緊要，有心唔怕遲、最後佢話同我好好傾，希望第日有機會再傾』(咁即係叫我join plan)

又到姑娘出場，給我一杯冬瓜水(真係好服侍呢)，一邊傾：『唔，你可以一個月做一次激光療程，一次$4000』(想不到真的有$4000的facial，我同事成日講有人一個月花$3000落塊面到我都唔信)，我於是放下心頭大石，我還擔心自己會落入兩難當中，見d療程咁有用，自己又老囉，都心郁郁，但見到咁o既價錢，馬上堅定晒！因為我都捱o左兩小時，又同呢個傾又同果個傾，真係好累，又想返屋企同津津去中秋晚會，我同姑娘講我唔使再聽其他plan，因為我真係無打算join，佢見我個樣咁堅定，都放過我(我諗住佢唔放過我我就同佢講我一個月都係$4000蚊人工的)。

醫學美容，勁呀~

回到家裡，老公帶了津津去新都城玩，津津見到我超開心，攬住我，說係掛住我，又不停說話，佢同我講佢去中秋晚會的事：『小丑俾人攔住o左』我：『吓~~~~』

等老公解釋下啦

事緣老公同津津開開心心落樓去中秋晚會，半路中途，老公說漏了口，話去搵小丑拎波波，怎知津津突然停下，一言不發，老公問：『你仲乜唔行？』津津沒答話，洒洒手，然後倒頭回家，老公問：『你仲乜唔去中秋晚會？』津津依然沒答話，洒洒手，老公問：『你係唔係驚小丑呀？』津津點點頭，老公說：『唔使驚呀，小丑俾d人係果到攔住o左啦』，呢個就係津津果句話的由來啦！

唔知津津大個睇返，會唔會笑自己？不過，anyway，我都已經笑瓜了！哈哈