姊妹淘

說的不是新的電視節目，是我和我的媽媽。

昨天晚上，媽媽和她中學的好姊妹吃飯，吃完之後晚上回家，因為我等了媽媽很久，很掛念媽媽，因此要和媽媽傾計，想不到我和媽媽什麼話題都可以傾一頓，不願停，因為話題太多，也講得很深入，所以以下的只是一些簡單的節錄：

1.      講走火警

我說：『媽媽，你細個讀幼稚園低班果時有冇走過火警呀？』

媽媽說：『點只細個呀，而家媽媽返工都要火警演習架！』

我說：『係咁架，食茶點果時突然警鐘響，唔係LIN LIN咁架，係LINLINLIN…好長O既，跟住我地餅干都唔可以拎，要一個跟一個集隊，高班企呢到，低班企呢到，幼兒班企呢到…』

2.      講返學/工作

媽媽說：『津津，你鐘唔鐘意梁老師呀？』

我說：『唔鐘意， 梁老師好惡架，我鐘意張老師、丘老師、 李老師同埋林老師…』

媽媽說：『係呀，我都覺得 李老師好錫你呀，上次去小白鷺係都要同你影相』

我說：『佢仲成日抱我架』

媽媽說：『媽媽係公司都有好多人錫架，好似楊叔叔啦、CONNIE，CONNIE今日整咗個蛋糕俾我添呀！』

3.      講化妝

我說：『…個口係要查紅色…』

媽媽說：『而家唔興查紅色架啦，而家係查到閃閃地咁架』

我說：『你點知架？』

媽媽說：『我睇姊妹淘講架』

我說：『但係XX都係查紅色架喎』

媽媽說：『佢其實唔係幾識化妝，不過你千其唔好講返俾佢知呀，如果唔係佢會唔開心架』

4.      講電影

我問：『媽媽，你有冇睇反斗奇兵3呀？』

媽媽說：『無呀！』

我說：『唔係喎，你上次咪同我地齊睇架囉！』

媽媽說：『咁咪係囉，明知仲問！』

我說：『咁你記唔記得泡泡龍講乜呀？』

媽媽說：『係咪話，"安仔咁對我地，佢真係刺痛我的心呀！"？』

我說：『唔係呀，呢句係薯蛋頭先生講架！』

媽媽說：『咁薯蛋頭太太係咪話，"你救o左我地，我地會一世感激你架"？』

我說：『唔係呀，呢句又係薯蛋頭先生講架！薯蛋頭太太係話：『我地o既乖仔…』咁架』』

媽媽說：『點解你咁記得o既？』

我說：『緊係啦，我睇咗幾百次架啦！』

5.      講人

媽媽說：『津津，MAY姐姐個肚又大咗D啦』

我說：『佢而家三個BB啦？』

媽媽說：『緊係唔係啦！』

我說：『咁個肚點解會大咗架？』

媽媽說：『咁BB會長大架麻』

 

媽媽見我捽眼，對我說：『津津，你再捽眼，第時就成個莫師傅咁架啦』

我說：『係咪桂蘭呀？』

媽媽說：『唔係呀，係莫平呀！』

6.      講…若果…

媽媽說：『津津，如果媽媽“混”你入厠所，你會點呀？』

我說：『我大叫爸爸』

媽媽說：『媽媽太惡，爸爸唔理你呢？』

我說：『我大叫細佬』

媽媽說：『媽媽太惡，細佬唔理你呢？』

我說：『我大叫AUNTIE』

媽媽說：『媽媽太惡，AUNTIE唔理你呢？』

我說：『我打電話俾嫲嫲』

媽媽說：『係喎，媽媽係嫲嫲面前就唔敢惡架喎，但係嫲嫲死咗啦喎』

我說：『當佢未死呀，不過我成日鬧佢，佢可能唔幫我』

媽媽說：『咁你有冇後悔鬧嫲嫲呀？』

我說：『無呀，因為佢真係好惡』(媽媽：『對不起，是津津不懂事才會說這樣的話，算吧，童言無忌啊~』)

 

媽媽說，小時候她想有個妹妹可以跟她傾計和分享，現在，她找到了！

一聽到有人送蛋糕給我，我馬上從媽媽的手袋裡找出來！