津津的話

烈火雄心

我和爸爸看烈火雄心，爸爸跟我解釋：『津津，你睇下d消防員走入火場到救人，幾偉大！』我說：『咁我地一齊俾個 "叻" 佢地呀！』

後來有一次跟爸爸和嫲嫲傾計，嫲嫲問我想做什麼，想不想做醫生，我說：『做醫生好辛苦架！』嫲嫲問我想做什麼，我想了一會，答：『做消防員！』

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

雙面人

媽媽說我，在家裡是一個惡人，在學校，對著老師，卻很乖，很會扮野啊！

有一次，甄老師說我又忘記帶口罩返學，我"喊晒口"地說：『我提o左媽媽架，係媽媽唔記得帶渣！』甄老師說：『好啦，我在facebook留言給你媽媽啦！』

有一次，我回到家裡很開心地跟媽媽說：『媽媽，我有新毛巾盒！』正當媽媽感到奇怪，發現原來是同學仔弄錯放了在我書包裡的毛巾盒，媽媽著我不要搞人家的東西，但我卻硬要打開來看。第二日返學，媽媽在我書包裡拿出同學仔的毛巾盒，著我告訴朱老師，怎知去到學校門前，我很緊張，跟媽媽說：『你拎住啦！』媽媽說：『你自己還俾朱老師啦！』我便對爸爸說：『你拎住啦！』爸爸同樣著我拿給朱老師。朱老師看見，媽媽跟朱老師解釋，朱老師問我：『個毛巾盒係邊個架？』我蚊滋咁細聲地說：『羅克豪』，朱老師說：『嘩，佢高班架啦喎，仲放錯，等我陣間幫你話佢佔用o左你書包d空間！』媽媽被津津那慌失失的行為笑死。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

老積

因為我實在太會學媽媽的講話…

有一次，當我手拿著玩具，爸爸著我拿一樣東西給他，我說：『我隻手拎住野呀，點幫o者，我有五隻手咩？』(是的，我認為，五是多，一是少，所以有時媽媽要求給她五分鐘沖涼時間，我會說：『一分鐘好啦』)

有一次，媽媽給我吃一個十分甜的橙，吃完後我要求再吃，媽媽說：『唔好食咁多啦，食奇異果啦！』我說：『算你啦！』

有一次，我去完厠所洗手，嫲嫲以為我玩水，叫我別要玩水，我說：『我洗手呀，唔通去完厠所唔使洗手架咩？』

有一次，嫲嫲得罪了我，說：『對唔住囉！』我說：『對唔住都無用，你都仲係咁曳曳！』

最老積又搞笑還是有一次，我和媽媽穿過公園返學去，公園裡一位婆婆叫我靚女，媽媽問我：『佢叫邊個？』我用喉嚨音，即好似慌會有人聽到似的，拍拍心口說：『我呀！』媽媽問：『點解佢叫你靚女o既？』我半掩咀，用喉嚨音，說：『因為我係靚女囉！』